თბილისი (GBC) - კვირის ბოლო სავაჭრო სესიაზე ნავთობის ფასები მცირედ მინუსშია. Brent-ის მარკის ნავთობი, თბილისის დროით 10:35 საათისთვის, 0,16%–ით არის შემცირებული და ბარელი $44,13 ღირს. ამერიკული WTI-ს ფასი 0,29%–ით შემცირდა – $41,77–მდე ბარელზე.

ამასობაში ლიბია და დანაპირებს ასრულებს და ნავთობმოპოვება უკვე დღე–ღამეში 1,25 მლნ ბარელამდე გაზარდა. ამის შესახებ განცხადება ლიბიის ეროვნული ნავთობკორპორაციის (NOC) ხელმძღვანელმა მუსტაფა სანალამ გააკეთა.

სანალა უკვე შეხვდა Total–ის ახლო აღმოსავლეთისა და ჩრდილოეთ აფრიკის სტრუქტურის ხელმძღვანელს სტივენ მიშელს. შეხვედრაზე ფრანგული კომპანიის წარმომადგენელმა ლიბიაში Total-ის საინვესტიციო ბაზისა და ლიბიაში ნავთობმოპოვების გაზრდის სურვილი გამოთქვა, აღნიშნულია NOC–ის მიერ გავრცელებულ ინფორმაციაში.

ქვეყანაში არსებული საომარი მდგომარეობის გამო ლიბია გათავისუფლებულია OPEC+ ფორმატში მიღწეული შეთანხმებისგან, რომელიც ნავთობმოპოვების შემცირებას ითვალისწინებს. ნოემბრის დასაწყისში NOC–ის ხელმძღვანელი აცხადებდა, რომ ლიბია შეთანხმებას მხოლოდ მას შემდეგ შეუერთდება, რაც დღე–ღამური მოპოვების სტაბილურ ნიშნულს შეინარჩუნებს 1,7 მლნ ბარელის დონეზე.