თბილისი (GBC) - კიბერუსაფრთხოების სფეროში სპეციალისტების დეფიციტი უკვე 2021 წელს მოგვევლინება მწვავე პრობლემად. ამის შესახებ საერთაშორისო აუდიტორული კომპანია „ფრაისუოთერჰაუსკუპერს“–ის (PwC) კვლევის შედეგებშია ნათქვამი.

კვლევის თანახმად, მომავალ წელს მსოფლიოს კომპანიების 51% აპირებს კიბერუსაფრთხოების საკუთარი სტაფის გაზრდას. ამის აუცილებლობა პანდემიის გამო ბევრი თანამშრომლის დისტანციური მუშაობის რეჟიმზე გადაყვანამ განაპირობა.

PwC–მ სხვადასხვა დარგის ტექნოლოგიური და ინფორმაციული უსაფრთხოების განყოფილებების ხელმძღვანელები, სულ მსოფლიოში 3 ათასზე მეტი ადამიანი გამოკითხა. მათ შორის დასავლეთ ევროპაში (34%), ლათინურ ამერიკაში (8%), ჩრდილოეთ ამერიკაში (29%), აზია–წყნარი ოკეანის რეგიონში (18%), აღმოსავლეთ ევროპაში (4%), ახლო აღმოსავლეთში (3%) და აფრიკაში (3%). გამოკითხული კომპანიების 22% კიბერუსაფრთხოების სფეროში შტატების 5%–ზე მეტით გაზრდას გეგმავს.

„საკადრო მენეჯერები მწვავე კონკურენციას აწყდებიან შრომის ბაზარზე კიდერუსაფრთხოების სპეციალისტების მოძიებისას. ბოლო კვლევების თანახმად, მხოლოლდ აშშ–ის ბაზარზე კიბერუსაფრთხოების სპეციალისტების რაოდენობა 50%–ით ნაკლებია გამოცხადებულ ვაკანსიებთან შედარებით“, – ნათქვამია კვლევის ანგარიშში.

მთლიანობაში, PwC–ის გამოკითხვის თანახმად, მსოფიოში კომპანიების 55% აპირებს კიბერუსაფრთხოებაზე ხარჯების გაზრდას, მიუხედავად იმისა, რომ ორგანიზაციების მენეჯერების უმრავლესობა (64%) შემოსავლების შემცირებას ელოდება.