თბილისი (GBC) - ყველაზე პოპულარული კრიპტოვალუტის, ბიტკოინის ფასი სამშაბათის ვაჭრობებზე, საშუალოდ, 3%–ით იზრდება. ანალიტიკოსები არ გამორიცხავენ, რომ მისი ფასი მალე შესაძლოა კლების მიმართულებით წავიდეს.

პორტალის CoinMarketCap მონაცემებით, რომელიც 20–ზე მეტი კრიპტოვალუტის საშუალო ფასს გამოითვლის, თბილისის დროით 11:42 საათისთვის ბიტკოინი 2,95%–ით ძვირდებოდა – $11 770–მდე.

ბიტკოინი გუშინ 2%–ით გაიზარდა, რაც მოულოდნელი იყო აქციების ბაზრის დაწევის ფონზე. სხვა წამყვანი კრიპტოვალუტებიც გაძვირდა, თუმცა ბიტკოინს ბევრად ჩამორჩებოდნენ. ექსპერტების აზრით, ალბათ, რაღაც მსხვილ გარიგებებს ჰქონდა ადგილი, ვინაიდან ყველა სხვა გარემოება ვარდნის მოლოდინს ქმნიდა.