თბილისი (GBC) - აშშ–ში ნავთობის მარაგების ზრდის შესახებ მოულოდნელი ცნობების ფონზე ოთხშაბათს მკვეთრად გაიაფებული „შავი ოქრო“ დღევანდელ სესიებზე ძალებს იკრებს.

ინვესტორების ყურადღების ცენტრში ამჟამად მექსიკის ყურეში მძვინვარე ქარიშხალია, რომელმაც უკვე გამოიწვია რეგიონში მომპოვებელი სიმძლავრეების 80%–ის შეჩერება, წერს MarketWatch. პროგნოზების თანახმად, ქარიშხალი „დელტა“ ლუიზიანას შტატის სანაპიროებს პარასკევს მიაღწევს.

ამ ფონზე Brent-ის მარკის ნავთობის დეკემბრის ფიუჩერსები, თბილისის დროით 9:05 საათისთვის ლონდონის ბირჟაზე 0,21%–ით იყო გაზრდილი და ბარელზე $42,08–ს შეადგენდა. წინა სესია ამ მარკის ნავთობმა 1,6%–იანი ვარდნით დახურა.

ამერიკული მსუბუქი ნავთობის WTI ფასი, ნოემბერში მიწოდების პირობით, ამ დროისთვის 0,05%–ით არის გაზრდილი და ბარელი $39,97 ნიშნულზე ივაჭრება. წინა სესიაზე ამერიკულმა ნავთობმა 1,8% დაკარგა.