თბილისი (GBC) - ეტალონური მარკების ნავთობის ფასი ორშაბათს იზრდება, გასული კვირის მნივშნელოვანი დანაკარგის შემდეგ, როდესაც Brent-მა დაახლოებით 8%, ხოლო WTI-მ 7,4% დაკარგეს.

პარასკევის მკვეთრ ვარდნას აშშ–ის პრეზიდენტისა და მისი მეუღლის კოვიდინფიცირების შესახებ გავრცელებულ ინფორმაციას უკავშირებენ.

„ნავთობის ფიუჩერსები რამდენიმეკვირიანი ზეწოლის ქვეშ იყვნენ, ვინაიდან ევროპასა და აშშ–ში კორონავირუსის გავრცელებამ ეჭვქვეშ დააყენა ეკონომიკური საქმიანობის აღირძინება. თუმცა, დონალდ ტრამპისა და თეთრი სახლის სხვა წარმომადგენლების ინფიცირების შესახებ გავრცელებულმა ინფორმაციამ მღელვარება კიდევ უფრო გაამწვავა, რის გამოც Brent და WTI პარასკევის სესიის დახურვისას მკვეთრად გაიაფდა“, – აღნიშნავს ANZ-ს ანალიტიკოსი, რომელსაც  S&P Global Platts ციტირებს.

Brent–ის მარკის ნავთობის დეკემბრის ფიუჩერსები ლონდონის ბირჟაზე, ორშაბათს დილით, 2,06%–ით გაძვირდა და ბარელი $40,08 ღირს.

ამერიკული მსუბუქი ნავთობის WTI ფასი, ნოემბერში მიწოდების პირობით, 2,38%–ით არის გაზრდილი და ბარელზე $37,93–ს შეადგენს.