თბილისი (GBC) - საზღვარგარეთ განათლების მიღება წლების წინაც ისეთივე აქტუალური იყო, როგორც ახლა. „საქნახშირს“ ტყბულის მხარეთმცოდეობის მუზეუმმა მიაწოდა ინფორმაცია, რომ 1900-იანი წლების დასაწყისში, ტყიბულში ცხოვრობდნენ და მოღვაწეობდნენ ადამიანები, რომლებმაც საქართველოს ფარგლებს გარეთ მიღებული ცოდნა სამშობლოს მოახმარეს.

ეს ადამიანი იყო ტყიბულელი იოსებ ჯაოშვილი, რომელმაც 1912 წელს, ავსტრიაში, ლეობენის საიმპერატორო სამთო სასწავლებელი დაამთავრა. ეს ფაქტი სასწავლებლის მიერ გაცემული ორიგინალი დიპლომით დასტურდება, რომელიც ტყიბულის მხარეთმცოდნეობის მუზეუმშია დაცული. იოსებ ჯაოშვილი ტყიბულში ჩამოსვლის შემდეგ საზოგადოება “ნახშირას“ საწარმოში მუშაობდა. მისი ინიციატივით დაინერგა ახალი მეთოდები ქვა-ნახშირის ხარისხის ამაღლების კუთხით. ჯაოშვილის ევროპული განათლება ინჟინერმა დ. ყიფიანმა ბრიკეტების საწარმოში და ქვანახშირის სარეცხებში გამოიყენა (1924-1925 წლებში). იოსებ ჯაოშვილის სახელი გარკვეული პერიოდის განმავლობაში ტყიბულის ერთ-ერთ ქუჩასაც ერქვა.

კიდევ ერთი ტყიბულელი, ვინც 1906 წელს, ავსტრიაში ქალაქ ლეობენში, საიმპერატორო სამთო სასწავლებელი დაამთავრა იყო კირილი ბოჭორიშვილი. ეს ფაქტიც ტყიბულის მხარეთმცოდნეობის მუზეუმში დაცული ოფიციალური დოკუმენტით დასტურდება.

 ტყიბულის მხარეთმცოდნეობის მუზეუმის ინფორმაცია