თბილისი (GBC) - ეტალონური მარკების ნავთობის ფასი მსოფლიო ბირჟებზე ორშაბათს წითელ ზონაში გადავიდა, გასული კვირის მკვეთრი ზრდის შემდეგ. 14–18 სექტემბრის კვირაში ნავთობის გაძვირებას ანალიტიკოსები OPEC+ ფორმატის წევრი ქვეყნების მიერ ნავთობმოპოვების შემცირების შესახებ შეთანხმების ზედმიწევნით შესრულებას უკავშირებდნენ.

ბაზრები მსოფლიოში COVID-19–ის გავრცელებასაც ადევნებენ თვალს, ვინაიდან ნავთობზე მოთხოვნის ზრდა მნიშვნელოვნადაა დამოკიდებული პანდემიის გავლენებზე გლობალურ ეკონომიკაზე, მიიჩნევენ დარგის ექსპერტები.

Brent-ის მარკის ნავთობის ნოემბრის ფიუჩერსები ლონდონის ბირჟაზე 0,06%–ით გაიაფდა და $43,09 ღირს. წინა სავაჭრო სესია ამ მარკის ნავთობმა $43,15 ნიშნულზე დახურა.

ამერიკული მსუბუქი ნავთობის ფასი, ოქტომბერში მიწოდების პირობით, ნიუ–იორკის სასაქონლო ბირჟაზე 0,07%–ითაა შემცირებული და ბარელი $41,04 ღირს.

გასულ კვირაში Brent 8,3%–ით, ხოლო WTI 10,1%–ით გაძვირდა.