თბილისი (GBC) - ეტალონური მარკების ნავთობის ფასები მსოფლიო ბირჟებზე, ზედიზედ მეორე დღეა, იზრდება. ამის მიზეზად აშშ–ში ქარიშხლის გამო ნავთობმოპოვების შეჩერება და ნავთობმარაგების შემცირება სახელდება.

Brent-ის მარკის ნავთობის ნოემბრის ფიუჩერსები ლონდონის ბირჟაზე, ოთხშაბათის სავაჭრო სესიაზე 1,65%–ით გაიზარდა ბარელზე $41,2 შეადგინა.

ამერიკული მსუბუქი ნავთობის WTI ფასი, ოქტომბერში მიწოდების პირობით, ნიუ–იორკის სასაქონლო ბირჟაზე 1,93%–ით არის გაზრდილი და ბარელი $39,02 ნიშნულზე ივაჭრება.

შეერთებულ შტატებში ქარიშხალი „სალის“ გამო ნავთობტერმინალები სამშაბათს დაიხურა, ხოლო ნავთობისა და გაზის მოპოვება 25%–ით შემცირდა. ქარიშხალმა მექსიკის ყურის სანაპიროს მიაღწია.

„ქარიშხალი „სალის“ გამო ჩვენმა დანაკარგებმა 11 დღის განმავლობაში 3–დან 6 მლნ–მდე ბარელი შეადგინა“, – ნათქვამია Rystad Energy–ს მიერ გავრცელებულ ინფორმაციაში.