თბილისი (GBC) - სამშაბათიდან ნაცვალგების ქვეყნების მოქალაქეებს საქართველოში შემოსვლისას კორონავირუსზე PSR-ტესტის პასუხის წარდგენა მოუწევთ - შესაბამისი გადაწყვეტილება რამდენიმე დღის წინ საკოორდინაციო საბჭომ მიიღო.

ამასთან ერთად 14-დან 8 დღემდე კარანტინის ვადა შემცირდა.

ტურიზმის ეროვნული ადმინისტრაციის ხელმძღვანელის, მარიამ ქვრივიშვილის განმარტებით, ნაცვალგების ქვეყნების მოქალაქეებმა 72 საათის განმავლობაში ჩატარებული ტესტის პასუხი უნდა წარმოადგინონ.

საგარეო საქმეთა სამინისტროს ცნობით, საქართველოს სახელმწიფო საზღვარი ამ ეტაპზე, ევროკავშირის 27 წევრი სახელმწიფოდან ხუთი ქვეყნისთვის (გერმანია, საფრანგეთი, ესტონეთი, ლატვია და ლიეტუვა) იხსნება იმ პირობით, რომ ამ ქვეყნის მოქალაქეებმა საქართველოში შემოსვლისას უნდა წარმოადგინონ ბოლო 72 საათის განმავლობაში ჩატარებული პისიარტესტის პასუხი, ან აეროპორტში განთავსებულ ლაბორატორიაში, საკუთარი ხარჯით ჩაიტარონ პისიარტესტირება.

თუმცა, არც ერთი ეს მიმართულება განსაკუთრებული აქტიურობით არ გამოირჩევა - 2020 წლის ივნისში ევროკავშირიდან საქართველოში 795 ადამიანი ჩამოვიდა, მაშინ როდესაც 2019 წლის ანალოგიურ პერიოდში - 57 830, ხოლო ივლისში - 1041 (73 448).