თბილისი (GBC) - ბოლო კვირების მანძილზე რუსეთში თითქმის 3-ჯერ გაიზარდა ფასები ჰერკულესზე, რამაც შესაძლოა გავლენა საერთაშორისო ფასებზეც მოახდინოს, რადგანაც რუსეთი ამ პროდუქტის ერთ-ერთი მსხვილი მწარმოებელი და ექსპორტიორია.

თუმცა, დისტრიბუტორთა ასოციაციის პრეზიდენტის ივა ჭყონიას თქმით, ამ ეტაპზე საქართველოში ჰერკულესზე ფასების ზრდა არ შეინიშნება - მათ შორის უკვე არსებული მარაგების გამო.

„ჩვენ ჯერ არ მიგვიღია არავითარი ინფორმაცია ჰერკულესის გაძვირებასთან დაკავშირებით, ამიტომაც უახლოეს პერიოდში ამ მხრივ არავითარი ცვლილებები მოსალოდნელი არაა“ - მიიჩნევს ის.

თუმცა, რადგანაც ქვეყანა მთლიანად დამოკიდებულია ჰერკულესის იმპორტზე, საერთაშორისო ფასების ზრდამ შესაძლოა პროდუქტის ღირებულება საქართველოშიც გაზარდოს.

„დღეს ძნელი სათქმელია, რამდენად მნიშვნელოვანი შეიძლება იყოს გაძვირება. ყველაფერი დამოკიდებულია საერთაშორისო ბაზარზე გაძვირების მასშთაბებზე“  - განაცხადა ჭყონიამ.

რუსული ჰერკულესის გაძვირებაზე ინფორმაციას არც სასურსათო პროდუქტების მსხვილ იმპორტიორ კომპანიაში  - ევროპროდუქტში - ფლობენ.

„ჩვენი შვრიის მომწოდებელი არის ფინური კომპანია, "ჰელსინკი მილსი" მას კი ჯერჯერობით ფასები არ გაუზრდია. შესაბამისად,  ჩვენც არ ვაპირებთ ღირებულების გაზრდას“ - განაცხადეს კომპანიაში.