თბილისი (GBC) - სააგენტო Bloomberg-ის გამოკითხული ექსპერტები ახალ პრობლემებს ელოდებიან, რომლების წინაშეც მსოფლიო ეკონომიკა წლის ბოლომდე დადგება. მათ შორის მოიაზრება პანდემიის მეორე ტალღა, უმუშევრობის დონის ზრდა და წამყვან ბაზრებზე დაბალი მოთხოვნა.

ანალიტიკოსები იმასაც აღნიშნავენ, რომ გლობალური ეკონომიკა, მთლიანობაში, ბოლო დროს აღორძინების მკაფიო სიგნალებს იძლება. შედარებით პოზიტიური დინამიკა განვითარებულ ქვეყნებში შეინიშნება. თუმცა, ამაში დამაიმედებელს ბევრს ვერაფერს ხედავენ, რადგან, მათი აზრით, ზრდის ტენდენცია შეიძლება პიკზე იყოს დღეს და ხვალიდან პროცესები ისევ მინუსში გადავიდეს.

ექსპერტების აზრით, საგრძნობი იქნება კორონავირუსის პანდემიის მეორე ტალღის დარტყმა ეკონომიკაზე. ეკონომიკის აღორძინების პროცესი ახალ გამოწვევებს შეეჩეხება – შეზღუდვები, აკრძალვები. ეს კი კვლავ შეამცირებს ბაზარზე მოთხოვნას, რაც მცირედით, მაგრამ მაინც იზრდებოდა ბოლო პერიოდში.

ამასთან, ზოგიერთი ქვეყანა, მაგალითად ჩინეთი, დღესაც ვერ დაუბრუნდა კრიზისამდელ მაჩვენებლებს, ვინაიდან მომხმარებლები არ არიან მზად იმ მოცულობის ხარჯის გასაღებად, როგორიც იყო პანდემიამდე პერიოდში.