თბილისი (GBC) - საქართველოს საბანკო სისტემაში დეპოზიტების მოცულობამ 30,5 მლრდ. ლარი შეადგინა, მათ შორის ეროვნულ ვალუტაში - 12 მლრდ. რაც ანაბრების მთლიანი რაოდენობის 39,4%-ს შეადგენს.

თუმცა, ლარიზაციის მაჩვენებელი ძალიან განსხვავებულია დეპოზიტების სხვადასხვა კატეგორიებში.

მაგალითად, კერძო პირების მიერ გახსნილი ანაბრების მოცულობაა 16 მლრდ. ლარი, ეროვნულ ვალუტაში კი  მხოლოდ 4,1 მლრდ, ლარია - ანუ, 25,1%, რაც საშუალოზე მნიშვნელოვნად ნაკლებია.

ამავე დროს, იურიდიული პირების დეპოზიტების მოცულობა 11 მლრდ.-ს შეადგენს, ეროვნულ ვალუტაში კი - 5,3 მლრდ. რას მთიანი მოცულობის 45%-ს შეადგენს, რაც აღემატება როგორც კერძო პირების ანაბრების, ასევე მთლიანი დეპოზიტების ლარიზაციის დონეს.

ასევე დაბალია ლარის წილი მიმდინარე ანგარიშებში - მთლიანი 14 მლრდ-იდან  მხოლოდ 4,1 მლრდ, რაც ამ კატეგორიაში მთლიანი მოცულობის 25%-ია.

ლარიზაციის ყველაზე მაღალი მაჩვენებელია მთავრობის ანაბრებში  - 2,5 მლრდ. ლარი  - 100% ეროვნულ ვალუტაში.

ამდენად, ლარიზაციის მრავალწლიანი პროგრამის მიუხედავად, ფართო საზოგადოებაში ეროვნული ვალუტის მიმართ ნდობა კვლავაც სუსტია, და ლარიზაციის ის დაბალი დონეც კი, რომელიც არის, ძირითადად ბიზნესის და საჯარო სტრუქტურების ხარჯზეა მიღწეული.