თბილისი (GBC) - რუსეთის საგარეო საქმეთა მინისტრმა სერგეი ლავროვმა იმედი გამოთქვა, რომ რუსეთ–საქართველოს შორის ავიამიმოსვლის განახლება უახლოესი მომავლის საკითხია.

ამის შესახებ რუსეთის მთავარმა დიპლომატმა გაზეთ „ტრუდ“–თან ინტერვიუში ისაუბრა.

„მინდა იმედი ვიქონიო, რომ ავიამიმოსვლის აღდგენა უახლოესი მომავლის საკითხია. ყურადღებით ვაკვირდებით საქართველოში მიმდინარე პროცესებს, ბუნებრივია. ველოდებით სანიტარულ–ეპიდემიოლოგიური სიტუაციის ნორმალიზებას როგორც რეგიონში, ისე მთელ მსოფლიოში და ავიარეისების გახსნას სხვა მიმართულებებითაც“, – აღნიშნა ლავროვმა.

რუსეთის პრეზიდენტმა ვლადიმირ პუტინმა რუსულ ავიაკომპანიებს 2019 წლის 8 ივლისიდან საქართველოში რუსეთის მოქალაქეების გადაყვანა აუკრძალა. აღნიშნულ განკარგულებას რუსეთის პრეზიდენტმა 2019 წლის 21 ივნისს საღამოს მოაწერა ხელი. ეს გადაწყვეტილება ე.წ. გავრილოვის ღამეს უკავშირდებოდა.

ავიამიმოსვლის აკრძალვამდე, რუსეთიდან საქართველოში დღე–ღამეში 20–ზე მეტი ავიარეისი სრულდებოდა.