თბილისი (GBC) - საქსტატის ინფორმაციით, 2019 წელს საქართველოს ეკონომიკაში ჩადებული $1,310 მლრდ-ის ინვესტიციებიდან,  $634 მლნ ანუ, მთლიანი მოცულობის 48,4% მოდის რეინვესტიციებზე.

ეს ყველაზე მაღალი მაჩვენებელია ბოლო წლების განმავლობაში - მაშინაც კი, როდესაც ინვესტიციების მთლიანი მოცულობა 2019 წლის მაჩვენებელს აღემატებოდა, რეინვესტირების მაჩვენებელი მაინც უფრო დაბალი იყო.

მაგალითად, 2017 წელს ინვესტიციების დონე 2019-ზე მაღალი იყო  - $1,978 მლრდ, თუმცა რეინვესტირების მაჩვენებელი  მხოლოდ $616 მლნ იყო.

წინა წლებში მაჩვენებელი კიდევ უფრო დაბალი იყო - 2013 წელს ინვესტიციებმა $1,039 მლრდ შეადგინა, რეინვესტირებამ - $277 მლნ. 2014-ში - $1,873 მლრდ და $323 მლნ, 2015-ში - $1,7 მლრდ და $157 მლნ, 2016-ში  - $1,6 მლრდ და $311 მლნ, 2018-ში  - $1,3 მლრდ და $434 მლნ დოლარი.

აღსანიშნავია, რომ რეინვესტირების მკვეთრი ზრდა სწორედ 2017 წელს დაიწყო, ე.წ. „ესტონური მოდელის“ ძალაში შესვლის შემდეგ - ის რეინვესტირებული მოგების გადასახადისგან განთავისუფლებას გულისხმობს.