თბილისი (GBC) - თავი შევინახოთ, შევინარჩუნოთ და როდესაც ყველაფერი ეს აღდგება, ფორმა არ დავკარგოთ და ვიყოთ მზად, - განაცხადა პრემიერმა სოფელ ნიქოზის სანერგე მეურნეობაში ფერმერებთან შეხვედრაზე.

გიორგი გახარიამ ისაუბრა რატომ ეხმარება მთავრობა სოფლის მეურნეობას და აღნიშნა, რომ ეს ის დარგია, რომელიც ტურიზმის შემდეგ ყველაზე მეტად დაზარალდა, რადგან ხილ-ბოსტნეული, რომელიც ფერმერს უნდა მოეყვანა ტურისტებზე იყო გათვლილი.

პრემიერმა აღნიშნა, რომ სოფლის მეურნეობის დახმარების ბიუჯეტი დაახლოებით 300 მლნ-ია, უფრო მეტია საჭირო, თუმცა პატარა ქვეყანა სუსტი ეკონომიკით ცდილობს რესურსი სამართლიანად გადაუნაწილოს ყველა იმ ადამიანს, რომელსაც ეს სჭირდება.

ისაუბრა სოფლის მეურნეობის პროექტების პროექტებისა და ფერმერების მიერ მათი გამოყენების მნიშვნელობაზე.

"ყველა უნდა მიეჩვიოს, ქვეყანაში ყველა ბიზნესის წარმომადგენელი, რომ სოფლის მეურნეობას პირველ რიგში სახელმწიფო უნდა მიეხმაროს ასე ჰორიზონტალურად ყველას, საწვავის მაქსიმალურად გაიაფების ნაწილში ისევე, როგორც ეს ვაუჩერიზაცია ჰექტარ მიწაზე კარგი თემაა. ეს კარგად უნდა გამოვიყენოთ. 27 000-მა ფერმერმა გამოიყენა უკვე ეს, ისევე, როგორც ამ აგრო დიზელითაც სარგებლობენ. ესეთი მხარდაჭერა მთავრობის მხრიდან იქნება. ძალიან კარგად მახსოვს, ვაშლის ბაღებში რომ ვისხედით, ერთმა ჭკვიანმა კაცმა თქვა, წვეთოვანს რომ მიფინანსებთ, ჭაბურღილით დამიფინანსეთო და ეს გავაკეთეთ. იქიდან 2-3 იდეა წამოვიღეთ და ის წვეთოვანი გავაკეთეთ სწრაფად. ადამიანს, რომელსაც გვერდზე სარწყავი არ აქვს და ბაღები აქვს გაშენებული, რათ უნდა იმას წვეთოვნის დაფინანსება, თუ ჭაბურღილი არ დაუფინანსეს, საიდან უნდა მოიტანოს წყალი. ერთმა ჭკვიანმა ფერმერმა ეს გვითხრა, გავუკეთეთ და დავუფინანსეთ. ეს გვინდა ახლა თქვენგანაც. სხვა ყველაფერი იქნება წუწუნი - ვაიმე მომეხმარეთ, რა ვქნა, ვაიმე ტურისტი როდის ჩამოვა, ეს ყველაფერი როდის გამოსწორდება და სახელმწიფო, გამიუქმე ყველა გადასახადი, არაფრის გადახდა არ მინდა და ა.შ.“, - განაცხადა გიორგი გახარიამ.