თბილისი (GBC)- ტურისტული ლოკაციებისა და ტურისტული ქალაქების მართვის კუთხით სერიოზული გამოწვევა გვაქვს , - ამბობს პრემიერი გიორგი გახარია დავოსში ჟურნალ Entrepreneur-თან მიცემულ ინტერვიუში. პრემიერი ამბობს რომ ყველა უწყება ცალ-ცალკე თავის ფუნქციას ასრულებს, თუმცა არსებობს კოორდინაციის პრობლემა, რომელშიც მოიაზრება მთის კურორტების განვითარების კომპანია, ეკონომიკის სამინისტრო, ადგილობრივი ხელისუფლება და ტურიზმის ადმინისტრაცია.

„ცოტა კოორდინაციის პრობლემაა, რაც გამოჩნდა ბაკურიანის და გუდაურის მაგალითით. ჩვენ გვაქვს ახალი საკანონმდებლო ინიციატივა, მსგავს ზონებში მენეჯმენტ კომპანიების შესაქმნელად. უნდა არსებობდეს 1 გენერალური მენეჯერი, რომელიც მართავს სრულად კურორტს“, - ამბობს პრემიერი და დასძენს რომ მსგავსი ვერტიკალის გაჩენის გარეშე მართვა გართულდება.

საკანონმდებლო ცვლილებები უახლოეს პერიოდში პარლამენტს წარედგინება და მომდევნო წლიდან კურორტებს გენერალური მენეჯერები ჩაიბარებენ.