თბილისი (GBC)  - მთავრობამ ფართოზოლოვანი ინტერნეტის განვითარების სტრატეგია დაამტკიცა. სტრატეგიის მიხედვით, ფართოზოლოვანი ინტერნეტის ბაზარი ბოლო 10 წელში მნიშვნელოვნად გაიზარდა.

ამჟამად ფიქსირებული ფართოზოლოვანი ინტერნეტის მომხმარებლების 82% ოპტიკურ-ბოჭკოვან კავშირს იყენებს. თუმცა, ფართოზოლოვანი ქსელები უმეტესად ქალაქებში გამოიყენება. კერძოდ, სოფლის შინამეურნეობების 35% უკავშირდება ფიქსირებულ ფართოზოლოვან ინტერნეტს, ქალაქში მცხოვრები შინამეურნეობებისთვის კი ეს მაჩვენებელი 90%-ია.

ქსელის განვითარების სტრატეგიის მიზანია, რომ 2025 წლისთვის მაღალი სიჩქარის ფართოზოლოვანი ქსელი (100 მბ. წმ+) ფიზიკურად და ფინანსურად ხელმისაწვდომი იყოს საქართველოს მასშტაბით.

2025 წლისთვის სამიზნე მაჩვენებლებია:

•               4G კავშირით საქართველოს ტერიტორიის დაფარვა;

•               5G სერვისის პილოტირება სულ მცირე სამ მუნიციპალიტეტში;

•               ყველა ინსტიტუციური სუბიექტებისთვის 1 გბ. წმ. კავშირზე წვდომა;

•               ყველა შინამეურნეობისთვის მაღალსიჩქარიან ფართოზოლოვან ქსელზე წვდომა.

მსოფლიო ბანკის ექსპერტების შეფასებით, საჭირო მთლიანი ინვესტიცია პროექტის განსახორციელებლად დაახლოებით $600 მლნ-ს (1.6 მლრდ ლარი) შეადგენს. ინვესტიციის უდიდესი ნაწილი კი კერძო სექტორიდან არის მოსალოდნელი.