თბილისი (GBC) - მსოფლიო ბანკი წლის მეოთხე კვარტალში საქართველოს ეკონომიკური ზრდის ტემპის შენელებას ელის. როგორც ბანკის მიმოხილვაში ვკითხულობთ, მიზეზი ეროვნული ბანკის მიერ გამკაცრებული მონეტარული პოლიტიკაა. კიდევ ერთ მიზეზად სახელდება როგორც ბიზნესის ასევე შინამეურნეობების ნეგატიური მოლოდინები. World Bank წერს, რომ ეროვნულ ბანკს მონეტარული პოლიტიკის გამკაცრებისკენ გაზრდილმა ინფლაციამ უბიძგა.

ლარის კურსზე, WB-ი აღნიშნავს, რომ ივნისის ბოლოდან სექტემბრის ბოლო პერიოდამდე ლარმა დოლარის მიმართ საკუთარი მსყიდველობითი უნარის დაახლოებით 8% დაკარგა. წლიურად ლარი 11%-ითაა გაუფასურებული.

„მონეტარული პოლიტიკის გამკაცრებასთან ერთად, ეროვნულმა ბანკმა სექტემბერში ლიმიტირებული ინტერვენციები ჩაატარა და ასევე შეამცირდა ბანკების უცხოური ვალუტის სარეზერვო მოთხოვნები, ოქტომბერში. ოქტომბერში ლარმა სტაბილურობა აჩვენა, თუმცა წლიური გაუფასურება 10.5%-ია“, - წერს WB-ი