თბილისი (GBC) - საბავშვო ტანსაცმლის ქართული ბრენდი Eshvikids-ი მალე იაპონიის ბაზარზე გამოჩნდება. Eshvikids-ი იაპონურ კომპანია Ronherman-ს შეკვეთას თებერვალში მიაწვდის და ქართული პროდუქცია Ronherman-ის 4 მაღაზიაში გაიყიდება.

Eshvikids-მა Ronherman-თან ბიზნესკავშირები ივნისში საერთაშორისო გამოფენაზე Pitti Bimbo დაამყარა. ის ერთ-ერთი ყველაზე ცნობილი მაღაზიაა არა მხოლოდ იაპონიის, არამედ აშშ-ს მასშტაბითაც.

როგორც GBC-სთან Eshvikids-ის ბრენდ მენეჯერი  მარიამ ფირანაშვილი ამბობს, მოლაპარაკებები მიმდინარეობს საფრანგეთისა და გერმანიის კონცეპტუალურ საბავშო მაღაზიებთანაც.

Eshvikids-ი ძირითადად ექსპორტზეა ორიენტირებული. კომპანიას საბავშო ტანსაცმელი ექსპორტზე იაპონიასა და ქუვეითში უკვე გააქვს. პროდუქციის შეძენა შესაძლებელია ონლაინ www.eshvikids.co.uk  ასევე ბრენდი წარმოდგენილია საერთაშორისო ონლაინ პლატფრომა www.farfetch.com-ზე.

Eshvikids-ის საბავშვო ტანსაცმელი მხოლოდ ნატურალური და ორგანული ქსოვილისგან იკერება, ქსოვილი კი კომპანიას თურქეთიდან და იტალიიიდან შემოაქვს. ამ დროისთვის კომპანიაში 8 ადამიანია დასაქმებული, თუმცა ჰყავს ქვეკონტრაქტორებიც.

რაც შეეხება სამომავლო გეგმებს, მარიამ ფირანაშვილის თქმით, წინ  ბრენდის საინტერესო განვითარებასთან ერთად ახალ საექსპორტო მიმართულებებს უნდა ველოდოთ.

კომპანია მონაწილეობას მიიღებს ფლორენციასა და პარიზში იანვარში დაგეგმილ საერთაშორისო გამოფენებზე.

Eshvikids-ის დამფუძნებელი თათუნა სვანიძეა, რომელსაც ლონდონში აქვს დაფუძნებული სამკაულების ბრენდი Eshvi. კომპანია კარგი რეპუტაციით სარგებლობს და ხშირად არის ცნობილი ადამიანების ინტერესის საგანი და ბევრი მნიშვნელოვანი ჟურნალის გარეკანზეც ხვდება.