თბილისი (GBC) - გამყოფი ხაზის მიმდებარე სოფლების გაძლიერების მიზნით, საინვესტიციო პროექტების მომზადება პრიორიტეტულია“ -„საპარტნიორო ფონდის“ აღმასრულებელმა დირექტორმა სამშვიდობო ინიციატივის „ნაბიჯი უკეთესი მომავლისთვის“ ფინანსური ინსტრუმენტის -„მშვიდობის ფონდი უკეთესი მომავლისთვის“  კონფერენციაზე განაცხადა..

„მშვიდობის ფონდი უკეთესი მომავლისთვის“ შერიგებისა და სამოქალაქო თანასწორობის საკითხებში სახელმწიფო მინისტრის აპარატთან ერთად, „საპარტნიორო ფონდმა“ და „საქართველოს სავაჭრო-სამრეწველო პალატამ“ დააფუძნეს. მისი მიზანია, საოკუპაციო ხაზების გასწვრივ ხელი შეუწყოს მშვიდობის მშენებლობას, მოსახლეობის მდგომარეობის გაუმჯობესებას, ასევე, ინდივიდუალური და პარტნიორული ბიზნეს პროექტების განხორციელებას.

„საპარტნიორო ფონდი“ ქმედით ნაბიჯებს დგამს - „სტარტაპ საქართველოს“ და USAID Zrda-ს ერთბლივ პროექტს „ახალი საწარმოები გამყოფი ზოლის მიმდებარე სოფლებში“. USAID Zrda $500 000 -ს გამოჰყოფს, რომლითაც „სტარტაპ საქართველოს“ გამარჯვებულები დაფინანსდებიან. 5-წლიანი პროგრამა მიზნად ისახავს ეკონომიკური განვითარების ხელშეწყობას საქართველოს 5 რეგიონის 106 სოფელში. ამ გზით, დამწყებ მეწარმეებს შანსი ეძლევათ, საოკუპაციო გამყოფი ხაზის მიმდებარე  სოფლებში ინოვაციური ბიზნესები წამოიწყონ. დაფინანსება გრანტით გაორმაგდება. ვფიქრობ, ეს არის ქვეყნის გამთლიანებისკენ გადადგმული კიდევ ერთი ნაბიჯი", - განაცხადა დავით საგანელიძემ.

კონფერენცია შერიგებისა და სამოქალაქო თანასწორობის საკითხებში სახელმწიფო აპარატის ორგანიზებით გაიმართა, რომელშიც მონაწილეობა საქართველოში აკრედიტებული დიპლომატიური კორპუსისა და საერთაშორისო ორგანიზაციების წარმომადგენლებმა მიიღეს.