თბილისი (GBC) - 70-წლის ქალბატონი კვირაში ერთხელ გორის სასამართლოში დადის და მეუღლის პროცესებს ესწრება. ერთი თვეა მისი მეუღლე პატიმრობაშია. 74-წლის მამაკაცი საბრალდებო სკამზე ზის და განაჩენს ელოდება.წინასწარ პატიმრობაში მყოფს ოჯახურ ძალადობაში ედება ბრალი.

პროკურორის განცხადებით, ბრალდებულმა მეუღლეს ფიზიკური შეურაცხყოფა მიაყენა, წააქცია, რის შედეგადაც მოტეხილობები მიიღო.

,,რა ვქნა ბოდიში მოვუხადო?" - ჰკითხა მოსამართლეს ბრალდებულმა.

,,თუ ამას გააკეთებთ, კარგი იქნება" - უპასუხა მოსამართლე გოგა კუპრეიშვილმა.

,,აჰა, მოვუხდი" - დასძინა ბრალდებულმა.

მას ადვოკატი არ ჰყავს. მოსამართლემ ადვოკატის აყვანა შესთავაზა, თუმცა ბრალდებულმა განაცხადა, რომ დამცველის დაქირავების საშუალება არა აქვს. სასამართლომ სახაზინო ადვოკატი დაუნიშნა. სხდომა კიდევ ერთი კვირით გადაიდო. (საინფორმაციო ცენტრი - შიდა ქართლი).