თბილისი (GBC) -ბიზნესმენ ავთო წერეთელს ბრალი წარედგინა.   

პროკურატურა ბიზნესმენს  „თიბისი ბანკის“ ხელმძღვანელების მიერ "უკანონო შემოსავლების ლეგალიზებაში დახმარებას ედავება. "სამგორი ჯგუფის" დამფუძნებელი ე.წ ხაზარაძე/ჯაფარიძის საქმეში ფიგურირებს და სწორედ ამ საქმის ფარგლებშია ბრალდების დადგენილება გამოტანილი. 

„გვსურს საზოგადოებას ვაცნობოთ, რომ მიმდინარე გამოძიების ფარგლებში მოპოვებული მტკიცებულებების ანალიზის შედეგად მიღებულია შემაჯამებელი გადაწყვეტილება ჯგუფის სხვა წევრის მიმართ. კერძოდ, გამოტანილია დადგენილება ავთანდილ წერეთლის ბრალდების შესახებ, მის მიერ, 16 664 000 ამერიკული დოლარის უკანონო შემოსავლის ლეგალიზაციაში დახმარების ფაქტზე, ჩადენილი ჯგუფურად, რასაც თან ახლდა განსაკუთრებით დიდი ოდენობით შემოსავლის მიღება. ავთანდილ წერეთელი დღეს დაბარებულია საქართველოს გენერალურ პროკურატურაში ბრალდების შესახებ დადგენილების წარდგენის მიზნით, რის შემდეგაც საქართველოს გენერალური პროკურატურა სასამართლოს მიმართავს შუამდგომლობით აღკვეთის ღონისძიების შეფარდების თაობაზე“, - განაცხადეს უწყებაში.

ამასთან, ცნობილი გახდა, რომ მამუკა ხაზარაძის და ბადრი ჯაფარიძის მიმართ ბრალი დაზუსტდება.