თბილისი (GBC) - საქართველოში Heineken -ის წარმოება დაიწყო.

წარმოების დაწყების რამდენჯერმე გადავადების შემდეგ,  „საქართველოს კაპიტალის“ შვილობილმა „გლობალ ბიერ ჯორჯიამ“ Heineken -ის  ბრენდის ლუდის ჩამოსხმა 2019 წლის ივლისში დაიწყო.

„საქართველოს კაპიტალის“ ცნობით, კომპანიამ 2019 წლის პირველ ნახევარში 4 ახალი დასახელების ლუდი გამოიტანა ბაზარზე, მათ შორისაა ლუდი „ყაზბეგი“, რომლის გამოყენების უფლება მარტში შეიძინა და Amstel -ი. შედეგად, ლუდის ბიზნესში EBITDA -ს მაჩვენებელი ივლისში დადებითი იყო და 0.6 მლნ ლარი შეადგინა.

მთლიანობაში კომპანია ივნის-ივლისში სრული დატვირთვით მუშაობდა.

წლის პირველ 6 თვეში ლუდის ბიზნესიდან შემოსავლები 37.7%-ით გაიზარდა და 18.2 მლნ ლარს გადააჭარბა. ჯამური მოგება 9.4%-იან ზრდას აჩვენებს  და 4.86 მლნ ლარს აღემატება.

სასმელების ბიზნესიდან (ლუდი, ღვინო, დისტრიბუცია) შემოსავალი „საქართველოს კაპიტალს“ 52% -ით გაეზარდა 46.2 მლნ ლარამდე. ჯამური მოგება 16.6 მილიონი იყო, თუმცა წმინდა ზარალი 24.7 მლნ შეადგენდა.