თბილისი (GBC) -  სათამაშოების მწარმოებელი ქართული კომპანია „ჯეოთოიზ“ მალე ბაზარზე ახალ პროდუქტს  საბავშვო ხალიჩას (ფაზლები) გამოიტანს.  

კომპანიის დამფუძნებლის დავით კაციტაძის თქმით, წარმოების ახალი ხაზის გამართვა ჩეხ პარტნიორ Maly Genius -თან ერთად ხდება.

დავით კაციტაძის თქმით, პროდუქციის ნაწილი ადგილობრივ ბაზარზე გაიყიდება, ნაწილი კი, ექსპორტზე ევროპაში გავა.

მწარმოებელი ამბობს, რომ ხარისხიანი სათამაშოების წარმოება უკვე  საქართველოში უფრო იაფი ჯდება, ვიდრე აზიაში, ან აღმოსავლეთ ევროპაში. დამატებითი სტიმულია ევროკავშირთან ღრმა და ყოვლისმომცველი თავისუფალი ვაჭრობის არსებობაც.

ჯეოთოიზი ხისგან ეკოლოგიურად სუფთა სათამაშოებს აწარმოებს. ამჟამად, საწარმოში ახალი სტანდარტის დანერგვა მიმდინარეობს, რაშიც "ჯეოთოიზს" გერმანიიდან მოწვეული სპეციალისტი ეხმარება.