თბილისი (GBC) – თბილისში პაკირების საფასურის ზონალურ-საათობრივი სისტემა შემოდის.

თბილისის მერის თქმით, საპილოტე პროექტი 1 ივლისიდან რამდენიმე ქუჩაზე, მათ შორის კოტე აფხაზის ქუჩაზე (ლესელიძე) ამოქმედდება.

ახალი ინიციატივის ფარგლებში დედაქალაქი რამდენიმე ზონად დაიყოფა და განისაზღვრება რა ეღირება თითოეულ მათგანში 1 საათის განმავლობაში პარკირება. ამასთან,  ავტომფლობელებს მიეცემათ დღეში 4, უფასო 15 წუთი, რა პერიოდის განმავლობაში ისინი ნებისმიერ საპარკინგო პუნქტში შეძლებენ ავტომობილის განთავსებას. 

თანხის გადახდა ადგილზე, დამონტაჟებული აპარატების მეშვეობით ან სპეციალური აპლიკაციითა იქნება შესაძლებელი. შემოსული თანხა საზოგადოებრივი ტრანსპორტის განვითარებას მოხმარდება. 

კახა კალაძის განცხადებით, პარკირების გადასახადი არ შეეხება საცხოვრებელი სახლის მიმდებარედ, ამ შენობის მაცხოვრებელთა მიერ გაჩერებულ ავტომობილებს, ელექტრომობილებს და შშმ პირების ავტომობილებს.

“ზონალური საათობრივი პარკირება არის ევროპის ყველა განვითარებულ ქვეყანაში, გადატვირთულ ქალაქებში დიდი ხნის წინ დანერგილი მოდელია და ის მიიჩნევა ერთ-ერთ ქმედით საშუალებად სატრანსპორტო სისტემის მოწესრიგების მიმართულებით“, - აღნიშნა კალაძემ.