თბილისი (GBC) - კომპანია „აგრო სოლუშენსმა“ მის მართვაში არსებული  სათბურიდან მარწყვი Carrefour -ის ქსელში შეიტანა.

მხარეებს შორის მიღწეული შეთანხმებით, კომპანია მოწეული მარწყვის მთელ მოცულობას მსხვილ რითეილერს მიაწვდის.

„აგრო სოლუშენსის“ მართვაში არსებული სათბური ამჟამად, 2000 კვ. მეტრია. სათბურში ფრანგული ჯიშის მარწყვის გაშენება ზაფხულში დაიწყო. ამ ჯიშის მარწყვი განსაკუთრებული გემოვნური თვისებებით და არომატით გამოირჩევა. ე.წ საკონდიტრო მარწყვი  ქსელში  პირდაპირ სათბურიდან, სამაცივრე მეურნეობაში დაყოვნების  გარეშე შედის. 

„აგრო სოლუშენსში“ აღნიშნავენ, რომ განსაკუთრებული ყურადღება მარწყვის ხარისხს ეთმობა. ნაყოფი  ლაბორატორიულად მოწმდება, რომ  ნიტრატების დონე დასაშვებ ფარგლებში იყოს.  

საკონსულტაციო კომპანია   სათბურში წამყვან ქვეყნებში გამოყვანილი ახალი ჯიშების ტესტირებასაც ახდენს. დაკვირვების შედეგებიდან გამომდინარე შესაძლოა, გვიანი გაზაფხულიდან საუკეთესო  შედეგების მქონე ჯიშის გამრავლება მოხდეს.