თბილისი (GBC) -  საქართველოს ბანკმა გენერალური დირექტორის შეცვლის ოფიციალური პროცედურა დაიწყო. 

შესაბამისი დოკუმენტაციის რეგისტრაცია ქვეყნის წამყვანმა ბანკმა დღეს მოითხოვა. 

უკვე 28 იანვარს, საქართველოს ბანკის CEO- ს რანგში, პირველი სამუშაო დღე ექნება არჩილ გაჩეჩილაძეს, რომელიც ამ პოსტზე კახა კიკნაველიძეს ანაცვლებს. 

კიკნაველიძე ამ ეტაპზე უფროსი მრჩევლის სტატუსს მიიღებს და მრავალწლიან გამოცდილებას  ისევ  BOG -ის განვითარებისკენ მიმართავს.

როგორც  ცნობილია, არჩილ გაჩეჩილაძეს  დღემდე არაერთ მნიშვნელოვანი პოსტი ეკავა კერძო სექტორში. მათ შორის, იგი კომპანია Georgia Global Utilities-ის გენერალური დირექტორის პოსტს და ამავდროულად, კომპანია ჯორჯიან „უოთერ ენდ ფაუერის“ სამეთვალყურეო საბჭოს თავმჯდომარის პოზიციას იკავებდა.

სხვადასხვა დროს იგი ასევე გახლდათ საქართველოს ბანკის გენერალური დირექტორის მოადგილე კორპორატიული და საინვესტიციო საბანკო მომსახურების მიმართულებით, ასევე კომპანიის მთავარი ფინანსური დირექტორი. არჩილი იკავებდა პოზიციებს მსოფლიოში წამყვან კომპანიებში, კერძოდ დიდ ბრიტანეთში, როგორიც არის: Lehman Brothers Private Equity, Salford Equity Partners, EBRD, KPMG Barents, World Bank.