თბილისი (GBC) -  საქართველოს აქვს ყველა რესურსი რეგიონის საგანმანათლებლო ცენტრი გახდეს, - მიიჩნევს  „შავი ზღვის უნივერსიტეტის“ (IBSU) რექტორი.

ილია ჩილოღლუ  აღნიშნავს, რომ საქართველოს აქვს კარგი გეოგრაფიული მდებარეობს, უსაფრთხო გარემო და ჰყავს მაღალკვალიფიციური პროფესორ-მასწავლებლები. ასევე ხელმისაწვდომია განათლების და ცხოვრების ხარჯები.

„რომ შევადაროთ რა დაუჯდება უცხოელ სტუდენტს სწავლა საქართველოში და ევროპაში, ჩვენ ამ მხრივ ძალიან მომგებიან პოზიციაში ვართ“, -  ილია ჩილოღლუ ამბობს, რომ თუნდაც IBSU -ში  საბაკალავრო დონეზე მიღებული განათლება არაფრით ჩამოუვარდება ევროპის ან აშშ-ს უნივესტიტეტებში მიღებული განათლების ხარისხს, რაც არაერთგზის დადასტურებული და აღიარებულია.  შედარებით პრობლემატურია დოქტურანტურა, სადაც კიდევ უფრო მეტია გასაკეთებელი.  

„შავი ზღვის უნივერსიტეტის“ (IBSU) რექტორის თქმით, საქართველოს დაახლოებით 20 000 ადგილი რჩება შეუვსებელი. 20 000 უცხოელი სტუდენტის მოზიდვა კი, ქვეყანას დამატებით 200 მლნ დოლარის შემოსავალს მოუტანდა.

„პრობლემა ისაა, რომ ამ შესაძლებლობების კარგად წარმოჩენას ვერ ვახერხებთ. აქტიური მუშაობაა საჭირო, რომ ეს სტუდენტები მოვიზიდოთ საქართველოში. ჩვენ პირადად, გარანტიას ვაძლევთ რომ მიიღებენ  იმ დონის განათლებას, რომელსაც მიიღებდნენ  აშშ-ში ან ევროპაში“, - აცხადებს IBSU -ს რექტორი.

აღსანიშნავია, რომ ამჟამად „შავი ზღვის უნივერსიტეტში" სტუდენტების 15 %  უცხოეთიდან არის ჩამოსული.