თბილისი (GBC) - „ლილო მოლი“, კავკასიის ერთ-ერთი უმსხვილესი სავაჭრო ცენტრი, რომელიც ყოველწლიურად მილიონობით ვიზიტორს იზიდავს აცხადებს რომ კომპანიის ონლაინ პლათფორმამ Liloshop.ge-მ ლილო მოლს მყიდველის რაოდენობა თითქმის გაუორმაგა.

„Liloshop.ge - ის ონლაინ პლატფორმის შემოღება, რა თქმა უნდა, დადებითად აისახა კომპანიის განვითარებაზე. „ლილო მოლს“, როგორც ოფლაინ-სავაჭრო ცენტრს, ჰყავს თავისი მომხმარებელი, რომელსაც ურჩევნია ტრადიციული შოპინგი ადგილზე  და მათი რიცხვი ყოველწლიურად სტაბილურად იზრდება. მომხმარებელთა გარკვეული ნაწილი კი, რომელიც  უპირატესობას ანიჭებს ონლაინშოპინგს, სარგებლობს Liloshop.ge - ის  ახალი ონლაინპლატფორმის სერვისით. ჩვენი მიზანია, მაქსიმალურად გავითვალისწინოთ  ბაზრის ტენდენციები და მომხმარებელთა მოთხოვნები“, - აცხადებს  ლილო მოლის გენერალური დირექტორი გიორგი კვარაცხელია.

ონლაინმაღაზია liloshop.ge 2018 წლის 1 ივლისიდან ამოქმედდა და მენეჯმენტის ცნობით, 6 თვის განმავლობაში უკვე ათასობით მომხმარებელმა ისარგებლა ონლაინსერვისით.

როგორც გიორგი კვარაცხელია აცხადებს პროდუქციას მთელი საქართველოს მასშტაბით აწვდიან და შესაბამისად, ეს სერვისი მოსახერხებელია როგორც თბილისის, ისე - საქართველოს სხვადასხვა რეგიონის მცხოვრებთათვის.

„გამოწერილი ნივთის მიღება შესაძლებელია ნებისმიერ მისამართზე. საიტის ვიზიტორებისა და ონლაინ მყიდველების რიცხვი ყოველდღიურად იზრდება. მიგვაჩნია, რომ Liloshop.ge-ს შექმნა აუცილებელი და დროული  გახლდათ ბიზნესის განვითარებისა და მომხმარებელთა ინტერესების დაკმაყოფილებისთვის“, ამბობს გიორგი კვარაცხელია.