თბილისი (GBC) – ეკონომიკის მინისტრი ლარის კურსის ვარდნას არ ელის.

გიორგი ქობულიამ კანონმდებლებთან საუბრისას ფიზიკის და ეკონომიკის კანონები მოიხმო და აღნიშნა, რომ ეკონომიკაში დოლარის ნაკლებობა არ არის, რამაც შეიძლება მასზე მოთხოვნა გაზარდოს და ლარის კურსის ვარდნა განაპირობოს.

„ჩვენ არაერთხელ გვითქვამს, რომ ლარის კურსს აქვს სტაბილურობა, ის შეიძლება იყო გამყარებული კიდეც, მაგრამ როგორც მინიმუმ იქნება სტაბილური. ეს არ არის ჩვენი განცდა, ეს არის მათემატიკაზე დამყარებული დასკვნები. მარტივად რომ ვთქვა, ლარის კურსი რომ დაეცეს, დოლარი ნაკლები უნდა იყოს ეკონომიკაში, ანუ დოლარი უნდა გავიდეს სადღაც. მოგიყვანეთ დაანგარიშება 2017 და 2018 წლებს შორის. ნაკლები კი არა 65 მილიონი დოლარით მეტი იყო ეკონომიკაში. რისგან უნდა გაიაფდეს ლარი?“, - კითხულობს მინისტრი და აღნიშნავს, რომ  ამ სიტუაციაში ლარის გაუფასურება  მხოლოდ შეიძლება  დიდი ფსიქოლოგიური ზეწოლის და  პანიკური ხასიათის მოვლენებმა განაპირობოს.

„ფუნდამენტალურად მეტია დოლარი და როგორ შეიძლება ლარი დავარდეს. ამას ფიზიკის და ეკონომიკის კანონები ეწინააღმდეგება,“ - განაცხადა გიორგი ქობულიამ.

აღსანიშნავია, რომ ბოლო პერიოდში ლარი წონასწორობის წერტილთან ახლოსაა - 1 დოლარი/ 2.66 ლარის ნიშნულთან ახლოს რჩება.

ბაზარზე ჭარბი დოლარის ნაკადები შეიმჩნევა, რის გამოც ეროვნული ბანკი  ინტერვენციებს ახორციელებს. მარეგულირებელი სტაბილურობის შესანარჩუნებლად  ლარს მეტად გამყარების საშუალებას არ აძლევს. 

ამ ფონზე მხოლოდ დეკემბერში სებ-მა ბაზრიდან 65 მლნ დოლარის შესყიდვა მოახდინა. სექტემბრიდან  110 მილიონი,  წლის განმავლობაში 200 მილიონზე მეტი აქვს შეძენილი.