თბილისი (GBC) - კომპანიამ “IGH Georgia” ზემო იმერეთი-რაჭის დამაკავშირებელი საავტომობილო გზის პროექტირება დაასრულა. 

საერთო სიგრძით 51,6 კმ საავტომობილო გზის პროექტი ითვალისწინებს 9,3 კმ სიგრძის არსებული გზის რეკონსტრუქცია-რეაბილიტაციას და ახალი, 42,3 კმ სიგრძის გზის მშენებლობას. პროექტის ფარგლებში დაგეგმილია 7 ხიდის მშენებლობა.

კომპანიის ცნობით, მარშრუტის პროექტირება ეტაპობრივად განხორციელდა, რამაც დამკვეთს შესაძლებლობა მისცა სამშენებლო სამუშაოები პარალელურად დაეწყო.

მალე დასრულდება საჩხერე -ქვემო ხევის 5 კმ-იანი მონაკვეთის მშენებლობა, მიმდინარეობს სატენდერო პროცედურები ზემო იმერეთი-რაჭის დამაკავშირებელი საავტომობილო გზის კიდევ ორი მონაკვეთის მშენებლობის მიზნით, საერთო ჯამში 14 კმ.

ზემო იმერეთი-რაჭის დამაკავშირებელი ახალი გზა თბილისიდან ონამდე მანძილს დაახლოებით 75 კმ-ით, ხოლო მგზავრობის დროს 1,5-2 სთ-ით შეამცირებს.

ამჟამად თბილისიდან ონამდე 300 კმ-ია და მგზავრობას დაახლოებით 6 სთ სჭირდება.