თბილისი (GBC) - ნავთობის ფასი ჩამოიშალა.

სამშაბათის ვაჭრობაზე, ბაზარზე განწყობების მკვეთრი ცვლილების ფონზე, ნავთობის ფიუჩერსებმა ღირებულების 7% დაკარგა. თუ ჯერ კიდევ 1 თვის წინ ტრეიდერები 1 ბარელი ნავთობის 100 დოლარამდე გაძვირებას პროგნოზირებდნენ, ახლა ფასების 55-65 დოლარამდე ვარდნას არ გამორიცხავენ.

13 ნოემბრის ვაჭრობაზე Brent -ის მარკის ნავთობის იანვრის ფიუჩერსების ღირებულება 6.6%-ით, 65.47 დოლარამდე დაეცა, WTI -მა ღირებულების 7.1% დაკარგა და 55.69 დოლარს მიაღწია.

აღსანიშნავია, რომ Brent -ის მარკის ნავთობი ოქტომბრის მაქსიმუმიდან ($86,29) 25%-ით არის გაიაფებული, რითაც  ოფიციალურად შევიდა ე.წ  „დათვების ციკლში“  (bear market).

WTI -ის მარკის ნავთობი კი, უკვე 12 სესიაა იაფდება.

რა მოხდა  ბაზარზე?

-ნოემბრის დასაწყოსში აშშ-მ სრულად აღადგინა ირანის წინააღმდეგ სანქციები, რომელიც 2015 წელს მოუხსნა. თუმცა თუ თავდაპირველად იმუქრებოდა, რომ ირანისდან ექსპორტს 0-მდე დაიყვანდა, ახლა 8 ქვეყანას უფლება მიეცა 6 თვის განმავლობაში ირანიდან ნავთობის შეძენა გააგრძელონ.

-ოქტომბრის ბოლოს ცნობილი გახდა OPEC -ის  და საერთაშორისო ენერგეტიკული სააგენტოს  ახალი პროგნოზი, რომ  ნავთობზე მოთხოვნილება მოსალოდნელზე ნელი ტემპით გაიზრდება. მიზეზი  გლობალური ეკონომიკის შემცირების ნიშნებია.

-ბაზარზე იმასაც შიშობენ, რომ ნავთბის მიწოდება მოთხოვნაზე სწრაფად გაიზრდება. საუდის არაბეთი მოპოვების შემცირებას ითხოვს, რასაც აშშ და დოლალდ  ტრამპი ეწინააღმდეგება. ტრამპმა  OPEC გააფრთხილა, რომ ფასები დაბალ ნიშნულზე უნდა შენარჩუნდეს.

-ამასთან, ჰეჯ-ფონდებმა გასულ კვირას მკვეთრად შეცვალეს პოზიცია და 2017 წლის აგვისტოდან მინიმუმამდე შეამცირეს ნავთობის ფასის ზრდაზე ფსონები.