თბილისი (GBC) - რიკოთის უღელტეხილზე  ხევი - უბისას მონაკვეთზე ავტობანს Hunan Road and Bridge Construction Group ააშენებს.

მასშტაბური პროექტის შემსრულებლად ჩინური კომპანია საავტომობილო გზების დეპარტამენტმა 10 პრეტენდენტს შორის შეარჩია.

გზის მშენებლობაზე 732.29 მლნ ლარი დაიხარჯება. თანხას აზიის განვითარების ბანკი გამოყოფს.  სამუშაოები   3 წელიწადში (1080 დღე) დასრულდება.

სხვა პრეტენდენტების მიერ შეთავაზებული ფასი 800 000-დან 1.14 მლრდ  ლარის დიაპაზონშია. 

პროექტი, ხევი-უბისას 12,2 კმ-იან მონაკვეთზე, ოთხზოლიანი გზის მშენებლობას ითვალისწინებს. აღნიშნულ მონაკვეთზე, 35 ახალი ხიდისა (18 ხიდი – თბილისი-არგვეთას მიმართულებით, ხოლო, 17 – არგვეთა-თბილისის მიმართულებით)  და 18 გვირაბის მშენებლობა იგეგმება.

მოხდება ხელოვნური ნაგებობების, წყალგამტარი მილების, შესაბამისი სადრენაჟო სისტემების მოწყობა. გატარდება საგზაო მოძრაობის უსაფრთხოების ღონისძიებები. ასევე დაგეგმილია  3 სატრანსპორტო კვანძის მოწყობა. პირველი კვანძი ხუნევსა და ვერტყვიჭალას შორის მოეწყობა, მეორე კვანძი  –  საქასრიაში, ხოლო მესამე კვანძი – ბორითში.

რიკოთის უღელტეხილზე, საერთო ჯამში დაგეგმილია 52  კმ-მდე სიგრძის გზის მშენებლობა, რომელიც 96 ხიდსა და 53 გვირაბს მოიცავს. რიკოთის საუღელტეხილო მონაკვეთის მშენებლობა 4 სექციად  არის დაყოფილი: ჩუმათელეთი-ხევის მონაკვეთი (I სექცია) 11.7 კმ, ხევი-უბისას მონაკვეთი (II სექცია) 12,2 კმ, უბისა-შორაპანის მონაკვეთი (III სექცია) 13 კმ.  შორაპანი-არგვეთას მონაკვეთი (IV სექცია) 14,7კმ.

ა