თბილისი (GBC) - პარტია „ქართული ოცნება-დემოკრატიული საქართველოს“ თავმჯდომარე ბიძინა ივანიშვილი საქართველოს მოქალაქეებს მიმართავს.

მიმართვაში ივანიშვილი ამბობს, რომ მიუხედავად წარმატებებისა ქვეყანაში მთავარ გამოწვევად რჩება არსებული სიდუხჭირე. 

"დღეს ყველაზე მნიშვნელოვანია, რომ ჩვენი სამშობლო ისევ ისტორიულ გზაგასაყართან დგას -  არსებობს მცდარი გადაწყვეტილების მიღების მაღალი რისკი, მაგრამ ამავე დროს, ეს არის ახალი შესაძლებლობების, განახლების საუკეთესო მომენტი.

რამდენიმე თვის წინ მომიწია პოლიტიკაში დაბრუნება. მომიწია, რადგან ვხედავდი, რომ პრობლემები ღრმავდებოდა და მათზე რეაგირების ეფექტური მექანიზმი არ არსებობდა. თუმცა აღმოჩნდა, რომ ხალხი კიდევ უფრო ღრმად და ნათლად ხედავდა ამ პრობლემებს. დღეს არ შემიძლია არ დაგეთანხმოთ", - აცხადებს ქართული ოცნების დამფუძნებელი. .

ექს-პრემიერს ციფრები არ დაუსახელებია, თუმცა თქვა, რომ აუცილებელია პენსიონერების და დევნილების შემწეობები და დახმარებები რადიკალურად გადაიხედოს, ასევე სასწრაფოდ უნდა შეიცვალოს საკადრო პოლიტიკა, რომელიც დაეფუძნება გამოცდილ ადამინებს და მოიზიდავს ახალ კადრებს, განსაკუთრებით ახალგაზრდებს. 

"მთავარია ახლა ხელისუფლებაზე და ცალკეულ ჩინოვნიკებზე გაბრაზებულებმა, ხელისუფლების დასჯის სურვილით, საკუთარი მომავალი და ქვეყანა არ დავსაჯოთ", - ამბობს ივანიშვილი მიმართვაში.