თბილისი (GBC) - საერთაშორისო სავალუტო ფონდმა  საქართველოს ეკონომიკის ზრდის პროგნოზს  ოქტომბერში უკვე მეორედ გადახედა.

World Economic Outlook -ის ოქტომბრის  ანგარიშით ფონდმა  2018 წელს,  საქართველოს ეკონომიკის ზრდის პროგნოზი  5.5%-მდე გაზარდა, თუმცა თვის ბოლოს ისევ 5%-იან ნიშნულზე დააბრუნა. 

2019 წელს ფონდის შეფასებით მშპ-ს ზრდის ტემპი 4.8%-ის ნაცვლად 4.6% იქნება.

„2018 წლის ივლისამდე ქვეყნის ეკონომიკა სწრაფად იზრდებოდა ძირითად სავაჭრო პარტნიორთა მაღალი ზრდისა და აქტიური ადგილობრივი მოთხოვნის გამო. თუმცა, ეს ფაქტორები ბოლო დროს შერბილდა. შესაბამისად, ჩვენ შევამცირეთ საქართველოს ეკონომიკის ზრდის პროგნოზი“, – განაცხადა მისიის ხელმძღვანელმა მერსედეს ვერა მარტინმა.

მისივე თქმით, ეკონომიკაზე შესაძლო უარყოფითი გავლენის მქონე რისკები გაზრდილია. 

"რისკების გათვალისწინებით აუცილებელია გაცვლითი კურსის მოქნილობის გაგრძელება, გონივრული მაკროეკონომიკური პოლიტიკის განხორციელება ბუფერების/რეზერვების ზრდის მიმართულებით და ფინანსური სექტორის ჯანსაღი პოლიტიკის გატარება“, – აღნიშნა სავალუტო ფონდის მისიის ხელმძღვანელმა.