თბილისი (GBC) - 2015 წლიდან სულ მცირე 17 ახალი შემთხვევაა, როდესაც თანამდებობაზე ივანიშვილის კომპანიებიდან წამოსული კადრი დაინიშნა/აირჩა, -"ქართული ოცნების" დამფუძნებელსა და მის ოჯახთან დაკავშირებული პირების თანამდებობეზე დანიშვნა/არჩევის საკითხზე "საერთაშორისო გამჭვირვალობა - საქართველო" წერს. 

ორგანიზაციამ თანამდებობის პირების ქონებრივი დეკლარაციები და ბიოგრაფიების შესწავლის საფუძველზე დაასკვნა, რომ კვლავაც გრძელდება საჯარო სექტორში მნიშვნელოვან პოზიციებზე ბიძინა ივანიშვილის კომპანიებიდან წამოსული კადრების დანიშვნის ტენდენცია.

კვლევის ფარგლებში, ქონებრივი დეკლარაციების მონაცემთა ბაზაში ის თანამდებობის პირები შეირჩნენ, რომლებსაც ბიძინა ივანიშვილთან დაკავშირებულ კომპანიებთან  ჰქონდათ კავშირი. ამჯერად კვლევა 40-მდე თანამდებობის პირს შეეხება.

ორგანიზაციის ცნობით, 2015 წლიდან სულ მცირე 17 ახალი შემთხვევაა, როდესაც თანამდებობაზე ივანიშვილის კომპანიებიდან წამოსული კადრი დაინიშნა/აირჩა, კიდევ 9 შემთხვევაში ასეთი პირები საჯარო სექტორში ახალ თანამდებობაზე დაინიშნენ/აირჩნენ. ასევე, სულ მცირე 9 ახალ შემთხვევაში, თანამდებობები ისეთმა პირებმა დაიკავეს, ვისი ოჯახის წევრებიც ივანიშვილის კომპანიებში არიან დასაქმებული.