თბილისი (GBC) - ანაკლიის პორტთან დამაკავშირებელი ინფრასტრუქტურის მოსაწყობად მთავრობა 271 მლნ ლარის დახარჯვას გეგმავს.

ანაკლიის პორტთან მისასვლელი საავტომობილო გზის და რკინიგზის ასაშენებლად თანხა ეტაპობრივად, 2018-2022  წლების ბიუჯეტებიდან გამოიყოფა. მათ შორის, 11 მლნ 2018 წელს,  20 მლნ - 2019 წელს. 75 -75 მლნ 2020/21 წლებში და 90  2022 წელს.

პროექტეს ფარგლებში იგეგმება 18 კილომეტრიანი ავტობანის და ასევე სარკინიგზო ხაზის გაყვანა.

ამჟამად, საავტომობილო გზების დეპარტამენტის მიერ მიმდინარეობს იმ კომპანიის შერჩევა, რომელიც ანაკლიის ღრმაწყლოვან პორტთან მისასვლელი საავტომობილო გზის, რკინიგზის და შესაბამისი ინფრასტრუქტურის მშენებლობისათვის დეტალური საპროექტო დოკუმენტაციის მომზადებას უზრუნველყოფს.

ტენდერში 4 კომპანია მონაწილეობდა, 3 მათგანის დისკვალიფიცირება მოხდა. ამჟამად, ლატვიური კომპანია Tilts -ის  სატენდერო დოკუმენტაციის განხილვა მიმდინარეობს. კომპანია სამუშაოების შესრულებისთვის 9.59 მლნ ლარს ითხოვს.