თბილისი (GBC) – სავალუტო ბაზარზე ლარი / დოლარის ვაჭრობის ბრუნვა გაზრდილია.

6 თვეში  543.8  მლნ დოლარის გარიგებები დაიდო, 14%-ით მეტი 2017 წლის ამავე პერიოდთან შედარებით.

მხოლოდ ივნისში  სავალუტო ბაზარზე აშშ დოლარი/ლარის ვაჭრობის მთლიანმა ბრუნვამ (ეროვნული ბანკის ინტერვენციების გარეშე) 92.8 მლნ აშშ დოლარი შეადგინა, რაც 31.4 მილიონი აშშ დოლარით (25 პროცენტით) ნაკლებია წინა თვის ბრუნვაზე და 13 პროცენტით მეტია წინა წლის ივნისის მონაცემზე.

იმავდროულად, ბაზრის მონაწილეებს შორის დადებული გარიგებების რაოდენობა 28 პროცენტით შემცირდა, წლიურად კი 34 პროცენტით გაიზარდა.

თვის განმავლობაში საქართველოს ეროვნულმა ბანკმა 3 სავალუტო აუქციონი ჩაატარა და ყოველ აუქციონზე 10-10 (ანუ ჯამში 30) მლნ აშშ დოლარი შეისყიდა.

სებ-ის ცნობით, ივნისში სავალუტო ბაზრის კონცენტრაცია ოდნავ გაიზარდა: ბანკთაშორის სავალუტო გარიგებების მთლიანი თანხის 59 პროცენტი ქვეყანაში მოქმედი 16 ბანკიდან და 4 მიკროსაფინანსო ორგანიზაციიდან 5 ყველაზე აქტიურ ორგანიზაციაზე მოდის.

დადებული გარიგებების რაოდენობის მიხედვით, ყველაზე აქტიურ 5 ორგანიზაციას ბაზრის 60 პროცენტი უჭირავს. ჰერფინდალ–ჰირშმანის ინდექსი 2 პროცენტული პუნქტით გაიზარდა და 9 პროცენტი შეადგინა, რაც ძალიან დაბალი მაჩვენებელია და სავალუტო ბაზრის კონკურენტულობაზე მიუთითებს