თბილისი (GBC) -  ეს არის სიცრუე, რომ 1 ლარი მაინც არის დახარჯული სახელმწიფო ბიუჯეტიდან, იმ გზის მოსაწყობად, რომელიც განკუთვნილი იყო ხეების გადასატანად და ამით თითქოს რაღაც შეღავათს ვუწევთ ბიძინა ივანიშვილს. ცალსახად ვაცხადებ ამას, - განაცხადა საავტომობილო გზების დეპარტამენტის თავმჯდომარემ საგანგებო ბრიფინგზე.

ირაკლი ქარსელაძე ტელეკომპანია რუსთავი 2-ის სიუჟეტს გამოეხმაურა,  აღნიშნა, რომ მას არ მიეცა საშუალება საკითხზე განმარტება თუნდაც სატელეფონო ჩართვით გაეკეთებინა. 

ქარსელაძემ აღნიშნა, რომ თავად ბიძინა ივანიშვილის მხრიდან 5 მილიონზე მეტი დაიხარჯა იმ გზების მშენებელობაზე სადაც გადასარგავმა ხეებმა გაიარა. 

"ჩვენი ინფორმაციით, 5 მილიონზე მეტი დაიხარჯა მარტო იმ გზების კეთილმოსაწყობად, სადაც მართლა გაიარა ხემ. აქ კაპიკი ფული ბიუჯეტს არ გადაუხდია, საერთოდ მონაწილეობა არ მიგვიღია, საერთოდ არ ვყოფილვართ ჩართული ამაში. მოეწყო მთელი რიგი გზები. ის გზები გზებად რჩება და შეღავათი მიიღო ბიუჯეტმა", - განაცხადა ქარსელაძემ.