თბილისი (GBC) -  საქართველოს დერეფანში ტვრითების 72% საავტომობილო გზით გადაიზიდება.

ეკონომიკის სამინისტროს სტატისტიკით, წლის პირველ 5 თვეში ტვირთბრუნვამ 14.7 მლნ ტონა შეადგინა. წლიურ ჭრილში კლება 0.2 მილიონამდე შემცირდა (წინა თვეში 0.3 მილიონიანი კლება იყო). მაისში ჩვენს დერეფანში 3.1 მლნ ტონა ტვირთი გატარდა.

საავტომობილო გზით გადაზიდული ტვირთების მოცულობა 0.1 მილიონით 10.6 მილიონ ტონამდე გაიზარდა. რკინიგზა 4.1 მლნ ტონა ტვირთს მოემსახურა (-0.3 მლნ).

ამავე დროს მკვეთრად, 19%-ით (27 457 TEU) გაიზარდა გადამუშავებული კონტეინერების რაოდენობა, რამაც 173 133 TEU-ს მიაღწია.

ტვირთის კატეგორიის ცვლილებაზე - საკონტეინერო გადაზიდვების ზრდასა და გარკვეული კატეგორიის მშრალი ტვირთის შემცირებაზე გასულ კვირას ეკონომიკის მინისტრის მოადგილემ გიორგი ჩერქეზიშვილმაც განაცხადა.

მსოფლიო კონტეინერიზაციის ტენდენციაზე მიუთითებენ ფოთის საზღვაო ნავსადგურშიც. პორტის ადმინისტრაცია 6 თვის მაჩვენებელბის შეჯამებისას აღნიშნავდა, რომ გენერალური და ნაყარი ტვირთების კონტეინერით გადაზიდვა თანდათან იზრდება, რაც ასევე აისახება ფოთის პორტში მშრალი და ნაყარი ტვირთების გადამუშავებაზე. მაგალითად, 2018 წლის 6 თვეში ფოთის საზღვაო ნავსადგურმა გადაამუშავა 3 მილიონ 140 ათასი ტონა ტვირთი რაც 2,1%-ით ნაკლებია 2017 წლის 6 თვის მონაცემებთან შედარებით.