თბილისი (GBC) - სანამ ტყიბულში შახტები დახურულია, კომპანია „საქნახშირი" მეშახტეებს განაცდურ საათებს 100%-ით აუნაზღაურებს - ამის შესახებ „ლიბერალს" კომპანიაში დაუდასტურეს. 

მათივე განმარტებით, კომპანიის ინტერესია, მალე დაასრულოს შინაგან საქმეთა, ჯანდაცვისა და ეკონომიკის სამინისტროებმა მოკვლევა, რომ შახტებში მუშაობა აღდგეს. რამდენი ხანი გასტანს ეს პროცესი, უცნობია(შსს-ს საგამოძიებო მოკვლევისთვის 2-კვირიანი ვადით აქვს გამოცემული ბრძანება).

„საქნახშირისვე" ინფორმაციით, კომპანიამ გაითვალისწინა მეშახტეების მოთხოვნა და ადმინისტრაციაში, სავარაუდოდ, გენერალური დირექტორის მოადგილედ მათი წარმომადგენელი, ელდარ ჩაფიძე დაინიშნება. ჩაფიძე ამ დროისთვის შახტის წარმოების ხელმძღვანელის თანამდებობაზეა. 

ასევე კომპანიაში ამბობენ, რომ ამ დროისთვის მათი მთავარი მიზანია, შახტში დაცული იყოს უსაფრთხოების ნორმები და მიწისქვეშ, გაწმენდითი სამუშაოები ინტენსიურად მიმდინარეობდეს.